३ असोज, सिन्धुली । संविधान दिवसको अवसरमा  जिल्ला प्रशासन कार्यालय सिन्धुलीको प्राङ्गणमा झण्डोत्तोलन गरिएको छ । भदौ २४ गते जेनजी आन्दोलनका क्रममा आगजनीका कारण क्षतिग्रस्त कार्यालयले सरसफाइपछि सामान्य सेवा सञ्चालन गर्दै संविधान दिवस विशेष समारोहसहित मनाएको हो ।

शुक्रबार (आज) बिहान प्रमुख जिल्ला अधिकारी दिनेशसागर भुसालले झण्डोत्तोलन गरेका थिए । सो अवसरमा नेपाल प्रहरीले झण्डा सलामी अर्पण गरेको थियो । समारोहमा जिल्ला प्रशासनका कर्मचारी, जिल्ला स्थित सुरक्षा निकायका प्रमुख एवं प्रतिनिधी, पत्रकार तथा सरोकारवाला लगायतको उपस्थिति रहेको थियो ।

समारोहलाई सम्बोधन गर्दै प्रमुख जिल्ला अधिकारी भुसालले व्यवहार, कार्यशैली र सुशासनमा सुधार ल्याउन सबै सरोकारवालाको ऐक्यवद्धता र प्रतिवद्धता आवश्यक रहेको बताए ।

जेन-जी आन्दोलनका क्रममा प्रदर्शनकारी युवाहरूले प्रशासनमा रहेको झण्डा डण्डीसहित उखेलेर लोकतान्त्रिक चोकमा गाडेका थिए । त्यसयता क्षतिग्रस्त प्रशासन कार्यालय आंशिक रूपमा सञ्चालनमा आएको थियो ।