सिन्धुली, ३० श्रावण / प्रधानन्यायाधीश प्रकाशमान सिंह राउतको अध्यक्षतामा बसेको न्यायपरिषदको बैठकले जिल्ला र उच्च अदालतका २१० न्यायाधीशको एकै पटक सरुवा गरेको छ। यसमा १२२ जिल्ला न्यायाधीश र ८८ उच्च अदालतका न्यायाधीश समावेश छन्।

सरुवा सूचीअनुसार विशेष अदालतका अध्यक्ष र चार सदस्य पनि सरुवा भएका छन्। विशेष अदालतका अध्यक्ष टेकनारायण कुँवर उच्च अदालत जनकपुरमा सरुवा भएका छन् भने उच्च अदालत जनकपुरका न्यायाधीश सुदर्शनदेव भट्टलाई विशेष अदालतको अध्यक्ष बनाइएको छ।

सिन्धुलीमा पनि न्यायिक सरुवा भएको छ। सिन्धुली जिल्ला अदालतका जिल्ला न्यायाधीश रमेश शर्मा पौडेल कपिलवस्तु पठाइएका छन् भने तनहुँका जिल्ला न्यायाधीश कमलराज विष्टले सिन्धुली जिल्ला अदालतमा जिम्मेवारी सम्हाल्ने छन्।