सिन्धुली । फाइल, हाजिरी र बैठकमै सीमित कर्मचारी अब कविता लेखेर पनि जाँचिने भएका छन् । सरकारी कार्यालयमा कार्यरत कर्मचारीबीच आपसी सम्बन्ध, सहकार्य तथा सामाजिक–सिर्जनात्मक गतिविधि प्रवर्द्धन गर्ने उद्देश्यले गठन गरिएको ‘कर्मचारी मिलन केन्द्र सिन्धुली’ले जिल्ला स्तरीय कविता प्रतियोगिता आयोजना गर्ने भएको छ । प्रतियोगिता असार ६ गते सञ्चालन गरिने केन्द्रका सचिव प्रविण कटवालले जानकारी दिए ।

प्रतियोगिता दुई चरणमा सञ्चालन हुनेछ । पहिलो चरणमा जिल्लास्थित सरकारी कार्यालयमा कार्यरत कर्मचारीबीच कार्यालयस्तरीय कविता प्रतिस्पर्धा गरिनेछ । जिल्लामा कार्यरत जुनसुकै सरकारी कर्मचारीले प्रतियोगितामा सहभागिता जनाउन सक्ने आयोजकले जनाएको छ ।

दोस्रो चरण विद्यालयस्तरीय हुनेछ । जिल्लाका माध्यमिक विद्यालयमा अध्ययनरत कक्षा ९, १०, ११ र १२ का विद्यार्थीले प्रतियोगितामा भाग लिन पाउनेछन् ।

प्रतियोगितामा सहभागी हुन इच्छुक कर्मचारी तथा विद्यार्थीले जेठ २२ गतेभित्र आवेदन दिइसक्नुपर्ने आयोजकले जनाएको छ । प्राप्त रचनामध्ये उत्कृष्ट सात कविता छनोट गरी असार ६ गते वाचन गराइने कार्यक्रम रहेको छ ।

इच्छुक सहभागीले आफ्नो कविता इमेल ठेगाना [email protected] वा व्हाट्सएप नम्बर ९८४१५९९१६३ मा पठाउन सक्नेछन् । थप जानकारीका लागि पनि सोही नम्बरमा सम्पर्क गर्न सकिने आयोजकले जनाएको छ ।