सिन्धुली / महिलालाई सीपमार्फत आत्मनिर्भर बनाउने उद्देश्यसहित तिनपाटन गाउँपालिका–८ बाहुनतिल्पुङमा सात दिने क्रिस्टल गहना निर्माण तालिम सुरु गरिएको छ ।

महिला, बालबालिका तथा ज्येष्ठ नागरिक मन्त्रालयको आर्थिक सहयोग, तिनपाटन गाउँपालिकाको सहकार्य तथा सामूहिक सरोकार समाज सिन्धुलीको आयोजनामा सञ्चालन भएको तालिमको  उद्घाटन शनिवार वडा नं. ८ का अध्यक्ष कृष्णप्रसाद गौतमले गरेका हुन् ।

उद्घाटन कार्यक्रममा अध्यक्ष गौतमले गाउँपालिकाले महिलाको आर्थिक सशक्तीकरणलाई प्राथमिकतामा राख्दै सीपमूलक कार्यक्रम सञ्चालन गरिरहेको बताए । उनले सिकेको सीपलाई व्यवहारमा उतार्न सके महिलाले गाउँमै बसेर पनि आत्मनिर्भर बन्न सक्ने उल्लेख गरे ।

सामूहिक सरोकार समाज सिन्धुलीकी अध्यक्ष रमिता मानन्धरले आर्थिक रूपमा कमजोर, एकल, दलित तथा सीमान्तकृत महिलालाई उद्यमशीलतासँग जोड्ने उद्देश्यले तालिम सञ्चालन गरिएको जानकारी दिइन् । उनका अनुसार क्रिस्टल गहना बनाउने सीपले महिलालाई घरमै बसेर आयआर्जन गर्ने अवसर प्रदान गर्नेछ ।

कार्यक्रम संयोजक नवराज पहाडीका अनुसार तालिममा वडा नं. ७ का १२ जना र वडा नं. ८ का १३ जना गरी २५ जना महिलाको सहभागिता रहेको छ । तालिमपछि सहभागी प्रत्येक महिलालाई व्यवसाय सुरु गर्न २६ हजार रुपैयाँसम्म सहयोग उपलब्ध गराइने उनले बताए ।

कार्यक्रममा गाउँपालिकाका लेखा प्रमुख अरुण रुपाखेती र लेखा सहायक अभिषेक मानन्धरले यस्ता तालिमले विपन्न महिलाको जीविकोपार्जन सुधारमा टेवा पुग्ने धारणा राखे ।

सात दिनसम्म सञ्चालन हुने तालिमको सहजीकरण कल्पना सेन्चुरीले गर्नेछिन् ।