सिन्धुली । नेपाली कांग्रेस सिन्धुलीले जिल्लामा ‘सय दिने अभियान’ सुरु गरेको छ । अभियान सञ्चालनका लागि कांग्रेस केन्द्रीय समितिले सिन्धुलीमामा केन्द्रीय सदस्य तथा प्रतिनिधि सभा सदस्य प्रतिमा गौतमलाई खटाएको छ ।

अभियानका लागि सिन्धुली कांग्रेसले पूर्वसभापति महासमिति, महाधिवेशन प्रतिनिधि, जिल्लाका पदाधिकारी तथा सदस्य समेतलाई ९ स्थानीय तहका ७९ वटै वडाका लागि प्रतिनिधि खटाएको नेपाली कांग्रेस सिन्धुलीका सहसचिव विष्णु कार्की ‘बिग्रह’ ले माईशिर डटकमलाई जनाकारी दिए ।

सय दिनको अभियानका क्रममा अभियानका क्रममा मृत्यु, राजीनामा, विदेश, पार्टी परित्यागका कारण रिक्त रहेको सभापतिबाहेकको पदमा केन्द्र र जिल्लाको परिपत्रअनुसार पदपूर्तिको व्यवस्था गरिने जनाइएको छ । पार्टी विधानबमोजिम तोकिएको सदस्यतासम्बन्धी काम गर्ने, गराउने र सदस्यता विशेष अभियानको रुपमा ‘सदस्यता घर आँगन’ अभियान सञ्चालनलाई प्राथमिकता दिइएको सहसचिव कार्कीले बताए ।

तीन महिना सञ्चालन हुने अभियान आउँदो पुस १६ गते बिपी जयन्तीका दिन समापन हुनेछ । अभियानको क्रममा आउदो मंसिर २० गते जिल्लाको सम्पूर्ण वडामा एकै दिन वडा भेला आयोजना गरिएको छ । वडामा हुने भेलाको एक संयोजक सहित सात देखि दस जना सदस्य सहितको प्रतिनिधि समूह खटाइएको छ ।

२० गते पछि चरणबद्ध पालिका, क्षेत्र, प्रदेश र जिल्ला स्तरको बिबिध कार्यक्रम तय गरिएको कांग्रेस सिन्धुलीले जनाएको छ ।