सिन्धुलीमाढी । सिन्धुली जिल्लाको कमलामाई नगरपालिका–६, स्थित गाैमती माध्यमिक विद्यालयका १५९ जना विद्यार्थीलाई आइतबार न्यानो कपडा वितरण गरिएको छ ।

स्विडेन निवासी प्रा.डा. दीपराज थापाको पहलमा संकलित ८२ हजार रुपैयाँबाट स्वेटर खरिद गरी विद्यार्थीहरूलाई वितरण गरिएको विद्यालयका प्रधानाध्यापक दीपक बुढाथोकीले जानकारी दिए ।

कमजोर आर्थिक अवस्थाका बालबालिकाको पठनपाठनमा सहयोग पुर्‍याउने उद्देश्यले विद्यालयले सार्वजनिक आह्वान गरेको र सोही क्रममा प्राडा थापाले सहयोगको प्रतिबद्धता जनाएअनुसार स्वेटर वितरण गरिएको हो ।

न्यानो कपडा वितरण कार्यक्रममा प्रा.डा. दीपराज थापाले सामुदायिक विद्यालयका विद्यार्थीलाई न्यानो कपडा सहयोग गर्ने अवसरका लागि विद्यालयलाई धन्यवाद दिए । साथै, उक्त सहयोग अभियानमा स्विडेनमा रहेका १७ जना साथीहरूको पनि साथ रहेको जानकारी दिए ।