सिन्धुलीमाढी। सिन्धुली जिल्लामा उत्पादन भएको खाद्यान्नले सिन्धुली जनसंख्यालाई अपुग हुने गरेको तथ्यांक सार्वजनिक भएको छ । कृषि विकास कार्यालय सिन्धुलीले गरेको जिल्लाको खाद्य अवस्था र अवश्यकतासम्बन्धी अनुसन्धानले जिल्लाको कुल जनसंख्या मध्ये करिव ३० हजारलाई अझै बाहिरी जिल्लाबाट खाद्यान्न आयात गर्नुपर्ने वाध्यता रहेको देखाएको हो ।

४४ औ विश्व खाद्य दिवसको सन्दर्भमा कृषि विकास कार्यालय सिन्धुलीले आयोजना गरेको कर्यक्रममा जिल्लामा खाद्यान्न आयात गर्नुपर्ने समस्या रहेको देखिएको हो । तथ्यांकले यहाँको जनसंख्यालाइ अझै ८ हजार ३ सय ५१ दशमलब ६ मेट्रिक टन खाद्यान्न अपुग रहेको देखाएको कृषि विकास कार्यालय सिन्धुलीका प्रमुख अरूण खनालले बताए ।

उनका अनुसार ‘सिन्धुलीमा ५१ हजार मेट्रिक टन खाद्यान्न मात्र उत्पादन हुने गर्दछ । सिन्धुलीको कुल जनसंख्या मध्येको करिव ३० हजार जनालाई अझै बाहिरी जिल्लाबाट खाद्यान्न आयात गर्नुपर्दछ । जिल्लाको कुल जनसंख्यालाई वार्षिक रूपमा ५९ हजार ४ सय ४३ मेट्रिक टन प्रशोधित खाद्यवस्तु समेत आवश्यक पर्दछ ।

हाल सिन्धुली जिल्लामा विशेष गरी धान, कोदो, मकै, फापर, गहुँ लगायतका अन्नबाली उत्पादन हुने गरेको छ । तर, जिल्लामा उत्पादित अन्नहरू खाद्यान्नको रूपमा प्रयोग नगर्दा यस्तो समस्या देखिएको हो । विषेश गरी पछिल्लो समय विभिन्न स्थानमा कोदो, मकै गहुँ, फापर लगायतका अन्नहरू घरेलु मदिरा लगायतका विभिन्न प्रयोजनमा प्रयोग गर्ने गरेका छन् । जिल्लामा उत्पादन भएको खाद्यान्न अपुग भएपछि  बार्षिक  ८ हजार मेट्रिक टन खाद्यान्न अन्यत्रबाट आयात हुने गरेको छ ।

हाल सिन्धुली जिल्लामा करिव ५७ हजार ८ सय ८८ हेक्टर जमिनमा खाद्यान्न बालीको खेती हुँदै आएको छ । तथ्यांक विभागको तथ्यांकअनुसार हाल सिन्धुली जिल्लाको जनसंङ्ख्या ३ लाख १ सय १७ रहेको छ ।