तोस्रामखोला । हिराथुम्की माध्यमिक विद्यालय, तोस्रामखोलामा सुरु भएको तीनपाटन गाउँपालिका स्तरीय मैत्रीपूर्ण शिक्षक भलिबल प्रतियोगिताको आज फाइनल खेल हुँदैछ।

गाउँपालिका स्तरीय मैत्रीपूर्ण शिक्षक भलिबल प्रतियोगिताको पालिका ­भरिका ९ वटा टिम सहभागी प्रतियोगिताको उपाधिका लागि आज वडा नं. १ बेलघारी र आयोजक विद्यालय तोस्राम ‘ए’ बीच प्रतिस्पर्धा हुने भएको छ। हिजो भएको सेमिफाइनल खेलमा वडा नं. १ बेलघारीले वडा नं. ९ आम्बोटेलाई पराजित गर्दै फाइनल यात्रा तय गरेको थियो भने तोस्राम ‘ए’ ले वडा नं. ५ लाई हराउँदै फाइनलमा स्थान बनाएको हिराथुम्की माध्यमिक विद्यालयका प्रधानाध्यापक अम्बर पुलामी मगरले जानकारी दिए।

त्यसैगरी, तृतीय स्थानका लागि वडा नं. ९ आम्बोटे र वडा नं. ५ बीच प्रतिस्पर्धा हुँदैछ।

प्रधानाध्यापक मगरका अनुसार प्रतियोगितामा पहिलो चरणमा लिग प्रणाली र दोस्रो चरणमा नकआउट प्रणाली अपनाइएको थियो। प्रतियोगितामा प्रथम हुने टिमलाई नगद ३० हजार रुपैयाँसहित शिल्ड, मेडल र प्रमाणपत्र, द्वितीय हुनेलाई नगद २० हजार रुपैयाँसहित शिल्ड, मेडल र प्रमाणपत्र तथा तृतीय हुनेलाई नगद १० हजार रुपैयाँसहित शिल्ड, मेडल र प्रमाणपत्र प्रदान गरिनेछ।

शिक्षकहरूबीच आपसी सद्भाव, खेल भावना र शारीरिक तन्दुरुस्ती प्रवर्द्धन गर्ने उद्देश्यले प्रतियोगिता आयोजना गरिएको आयोजकले जनाएको छ।