सिन्धुली, १ साउन  /  करदाता सेवा कार्यालय सिन्धुलीमै भए पनि आन्तरिक राजस्वसम्बन्धी सेवा लिन जनकपुरधाम पुग्नुपर्ने बाध्यता थियो। अब भने महोत्तरीको बर्दिबासमा आन्तरिक राजस्व कार्यालय सञ्चालनमा आएपछि सिन्धुलीका व्यवसायी र करदाताले नजिकैबाट सम्पूर्ण सेवा पाउने भएका छन्।

यस अघिको बर्दिबासमा करदाता सेवा कार्यालयलाई नै विस्तार गरी बिहीबारदेखि आन्तरिक राजस्व कार्यालयको रूपमा सेवा सुरु गरिएको जनकपुरधाम आन्तरिक राजस्व कार्यालयका प्रमुख कर अधिकृत आनन्दकुमार गुप्ताले जानकारी दिए।

कार्यालयले सिन्धुलीसहित सर्लाहीको हरिवन, लालबन्दी, मलङ्गवा, महोत्तरीको बर्दिबास, गौशाला र धनुषाको मिथिला नगरपालिकाका करदातालाई सेवा दिनेछ। कर संकलनसँगै कर परीक्षण, निरीक्षण र अनुसन्धानसम्बन्धी काम पनि यही कार्यालयबाट हुने भएको छ।

सिन्धुली उद्योग वाणिज्य सङ्घका अध्यक्ष अर्जुनकुमार श्रेष्ठले बर्दिबासमा आन्तरिक राजस्व कार्यालय खुलेपछि सिन्धुलीका उद्योगी व्यवसायीलाई ठूलो राहत हुने बताए। “यसअघि ठूला–ठूला सबै करसम्बन्धी कामका लागि जनकपुरधाम धाउनुपर्ने हुन्थ्यो। अब नजिकैको बर्दिबासमै सेवा पाउँदा समय र खर्च दुवै बच्नेछ,” उनले भने।

हाल यो कार्यालय बर्दिबासको मुख्य बजार क्षेत्रमा भाडाको घरमा सञ्चालनमा छ भने बर्दिबास–१४ मा अत्याधुनिक भवन निर्माणको तयारी भइरहेको कार्यालयले जनाएको छ।