हेटौँडा । बागमती प्रदेशको उद्योग, वाणिज्य, भूमि तथा प्रशासन मन्त्री शुकमाया तामाङले नागरिकको उपभोक्ता अधिकारको सम्मान गर्दै गुणस्तरीय, सुरक्षित र न्यायोचित मूल्यमा वस्तु तथा सेवा उपभोग गर्न पाउने हक प्रत्याभूति गराउनु राज्यको दायित्व भएको बताएकी छन् ।

आइतबार हेटौँडामा आयोजित विश्व उपभोक्ता अधिकार दिवस कार्यक्रमलाई सम्बोधन गर्दै मन्त्री तामाङले उद्योग मन्त्रालय उपभोक्ता अधिकारको संरक्षण, प्रवर्द्धन तथा कार्यान्वयनका लागि सधैँ प्रतिबद्ध रहेको बताइन् ।

‘आजको युग डिजिटल र नवप्रवर्तनशील प्रविधिको युग हो । धेरै सन्दर्भमा डिजिटल कारोबारमा उपभोक्ताको अधिकार सुरक्षित गर्ने विषय अझै महत्त्वपूर्ण बनेको छ,’ उनले भनिन्, ‘त्यसैले नेपालमा डिजिटल कारोबार तथा विद्युतीय सेवा प्रवाहलाई सुरक्षित, भरपर्दो र उपभोक्ता हितमैत्री बनाउनेतर्फ हाम्रो ध्यान केन्द्रित छ ।’ उनले उपभोक्ता अधिकारको प्रत्याभूति सुनिश्चित गर्ने कार्यमा सबैले आ–आफ्नो तर्फबाट सकारात्मक भूमिका निर्वाह गर्न व्यवसायी, उपभोक्ता अधिकारकर्मी, सङ्घसंस्था तथा सरोकारवालाहरूलाई आग्रह पनि गरिन् ।

“स्वच्छ र प्रतिस्पर्धी बजार, उपभोक्ता संरक्षणको दिगो आधार” भन्ने नाराका साथ आयोजना गरिएको कार्यक्रममा मन्त्रालयका उपसचिव सुनिता गजुरेलले कार्यपत्र प्रस्तुतीकरण गरेकी थिइन् । उनले मन्त्रालय अन्तर्गतका निकायबाट यस आर्थिक वर्षमा ६१४ जना व्यवसायीको अनुगमन गरिएको जानकारी गराइन् ।

उक्त अनुगमनका क्रममा ७ लाख ७२ हजार ९८१ बराबरको सामान नष्ट गरिएको र ११ लाख ८० हजार रुपैयाँ जरिवाना गरिएको उपसचिव गजुरेलले बताइन् । गजुरेलका अनुसार अनुगमनका क्रममा नुवाकोट जिल्लामा दर्ता नभई सञ्चालन गरिएको दुई वटा अस्पताल बन्द गरिनुका साथै जरिवाना समेत गरिएको छ ।