सिन्धुली, १४ भदौ । नेपाल पत्रकार महासंघका पूर्व अध्यक्ष एवम् राष्ट्रिय सूचना आयोगका प्रमुख सूचना आयुक्त डा. सुरेशप्रसाद आचार्य र बरिष्ठ साहित्यकार प्रा. डा. कृष्णहरि बरालले सिन्धुलीमा आयोजित एक कार्यक्रममा दुई पुस्तक विमोचन गरेका छन्।

कार्यक्रममा डा. आचार्यले शेषराज दाहालद्वारा लिखित ‘सिन्धुली पत्रकारिताको इतिहास’ पुस्तक विमोचन गरे भने प्रा. डा. बरालले ‘द्रव्य शाहदेखि गणतन्त्रसम्म’ पुस्तक सार्वजनिक गरे।

‘द्रव्य शाहदेखि गणतन्त्रसम्म’ पुस्तकको समीक्षा भीमविक्रम थापाले गरेका थिए भने साहित्यकार तुलसी प्रसाद ढकालले ‘सिन्धुलीको पत्रकारिताको इतिहास’ पुस्तकको समीक्षा प्रस्तुत गरेका थिए।

कार्यक्रमलाई सम्बोधन गर्दै प्रमुख सूचना आयुक्त डा. आचार्यले सिन्धुलीको पत्रकारिताको इतिहास लेखनको सुरुवात भएको बताउँदै यसलाई पूर्णता दिन नयाँ पुस्ताले जिम्मेवारी निर्वाह गर्नुपर्ने धारणा व्यक्त गरे। उनले लेखक शेषराज दाहाललाई नै जिल्लाको पत्रकारिताको इतिहासको जीवित प्रतीकका रूपमा उल्लेख गर्दै इतिहास लेख्ने कार्य गौरवपूर्ण रहेको टिप्पणी गरे।

साहित्यकार प्रा. डा. बरालले भाषा, साहित्य र इतिहास लेखनमा तथ्य र प्रस्तुती दुवैलाई महत्त्व दिनुपर्नेमा जोड दिए। उनका अनुसार पुस्तकमा देखिएका त्रुटिहरूलाई आगामी संस्करणमार्फत परिमार्जन गर्न सकिने भएकाले सृजनात्मक यात्रालाई निरन्तरता दिनुपर्ने आवश्यकता रहेको बताए।