सिन्धुली । प्रतिलिपी अधिकार कानूनको कार्यान्वयन अवस्था, देखिएका कमजोरी र श्रष्टाले पाउने रोयल्टीका विषयमा सिन्धुलीमाढीमा अन्तरक्रिया कार्यक्रम सम्पन्न भएको छ ।

नेपाल प्रतिलिपी अधिकार रजिस्ट्रारको आयोजनामा जिल्ला प्रशासन कार्यालय सिन्धुलीको सभाहलमा कार्यक्रम गरिएको हो । कार्यक्रममा रजिस्ट्रार सविता कार्कीले प्रतिलिपी अधिकार संरक्षणको अवस्था र चुनौतीबारे कार्यपत्र प्रस्तुत गरिन् । पछिल्ला वर्षमा श्रष्टाहरूले आफ्ना रचना दर्ता गर्ने संख्या बढे पनि कानूनको कमजोर कार्यान्वयन र चेतनाको कमीका कारण नेपालमा अन्तर्राष्ट्रिय स्तरअनुसार रोयल्टी संकलन हुन नसकेको उनको भनाइ थियो ।

सिन्धुली प्रहरी प्रमुख एसपी लालध्वज सुवेदीले प्रतिलिपी अधिकार उल्लङ्घनसम्बन्धी उजुरीको अनुसन्धान र अभियोजन प्रक्रियाबारे कार्यपत्र प्रस्तुत गर्दै व्यवहारमा उजुरी कम आउने समस्या औंल्याए ।

कार्यक्रमलाई सम्बोधन गर्दै जिल्ला न्यायाधीश कमलराज विष्टले बौद्धिक सम्पत्तिको संरक्षणका लागि श्रष्टा स्वयं सचेत हुनुपर्नेमा जोड दिए । सिन्धुलीमा हालसम्म बौद्धिक सम्पत्ति चोरीसम्बन्धी मुद्दा दर्ता नभएको उल्लेख गर्दै उनले प्रतिलिपी अधिकारसम्बन्धी कानूनको जानकारी बढाउनुपर्ने बताए ।

प्रमुख जिल्ला अधिकारी स्किम श्रेष्ठले नेपालमा प्रतिलिपी अधिकारसम्बन्धी ऐन, कानूनको प्रयोग न्यून रहेको भन्दै यसबारे व्यापक जनचेतना आवश्यक रहेको बताए । डिजिटल प्रविधिको तीव्र विकाससँगै प्रविधिमैत्री ऐन, कानून निर्माणतर्फ राज्यले पहल गर्नुपर्ने उनको भनाइ थियो ।

कार्यक्रममा सहभागी श्रष्टा, सर्जक र सरोकारवालाहरूले प्रतिलिपी अधिकारसम्बन्धी कानूनको जानकारी अभावका कारण बौद्धिक सम्पत्ति चोरी भए पनि उजुरी दर्ता हुने संख्या कम रहेको बताएका छन् ।