५ असोज, सिन्धुलमाढी / सिन्धुलीको कमलामाई नगरपालिका–१२ स्थित श्री कुण्डेश्वर माध्यमिक विद्यालयको प्राङ्गणमा आयोजित नगर स्तरीय मैत्रीपूर्ण शिक्षक भलिवल प्रतियोगिता हिजो (शनिबार) सम्पन्न भएको छ।

बडा दशैं, तिहार, छठ पर्व र ठूली एकादशी जस्ता प्रमुख चाडपर्वको अवसरमा आयोजना गरिएको यस प्रतियोगिता बिहीबारदेखि सुरु भएको थियो।

प्रतियोगितामा कमलामाई नगरपालिका वडा नं. ४, ६, ७, ८, ९ र १२ का कुल ६ वटा टोलीहरूले सहभागिता जनाएका थिए। शनिबार भएको फाइनल खेलमा वडा नं. १२ ले वडा नं. ६ लाई पराजित गर्दै पहिलो स्थान प्राप्त गर्यो। विजयी वडा नं. १२ ले खसीसहित शिल्ड, मेडल र प्रमाणपत्र प्राप्त गरेको छ भने उपविजेता वडा नं. ६ ले पनि खसीसहित पुरस्कार प्राप्त गरेको छ।

तेस्रो स्थानमा रहेको वडा नं. ९ ले ३ वटा लोकल भाले, शिल्ड, मेडल र प्रमाणपत्र प्राप्त गरेको छ। व्यक्तिगत पुरस्कारमा वडा नं. १२ का ईश्वर दाहालले ‘बेस्ट प्लेयर’ उपाधि जिते भने, वडा नं. ६ का सुमन देवकोटाले ‘बेस्ट स्पाइकर’ को सम्मान प्राप्त गरे।

यस प्रतियोगिताको प्रमुख उद्देश्य भनेको सामुदायिक विद्यालयका आंशिक र पूर्णकालीन शिक्षक–कर्मचारी बीच सहकार्य, समन्वय र एकता प्रवर्धन गर्नु, साथै खेलकुदप्रतिको स्वस्थ भावना विकास गर्नु रहेको आयोजकले जनाएको छ। प्रतियोगिता सफल बनाउन विद्यालय परिवार, विद्यार्थी, पुर्व विद्यार्थी, स्थानियवासी र अन्य विभिन्न पक्षका व्यक्तिहरूले महत्त्वपूर्ण योगदान पुर्‍याएका थिए।