सिन्धुली, २० भदौ / नेपाल कम्युनिष्ट पार्टी (एमाले) सिन्धुलीले शुक्रबार २१ औं विशाल–कुमार स्मृति दिवस विशेष श्रद्धाञ्जली सभासहित सम्पन्न गरेको छ । विधान महाधिवेशनका कारण प्रमुख नेताहरु काठमाडौँतर्फ लागेका बेला जिल्लामा भने सचिव नवराज थिङको विशेष उपस्थितिमा पार्टी कार्यालयमै कार्यक्रम आयोजना गरेर शेरमन कुँबर (विशाल) र मोहन चन्द्र गौतम (कुमार) को २१ औं स्मृति दिवश मनाएको छ ।

माओवादी युद्धको समयमा ०६१ साल भदौ २० गते सिरहाको धनसर्वा (धन्छवार) मा तत्कालीन शाही नेपाली सेनाको नियन्त्रणमा  विभत्स हत्या गरेका विशाल कुमारको स्मृतिमा एमालेले हरेक वर्ष श्रद्धाञ्जली कार्यक्रम गर्दै आएको छ । यस वर्ष पनि शहीदप्रति माल्यार्पणसहित सम्मान अर्पण गरिएको थियो ।

यसैबीच, विशाल कुमार स्मृति प्रतिष्ठानले यस वर्षको ‘विशाल कुमार स्मृति पत्रकारिता पुरस्कार’ राजधानी काठमाडौँमा आयोजना गरेर पत्रकार बद्री सिवाकोटीलाई प्रदान गरेको छ । एमाले बागमती प्रदेश कार्यालयमा  कार्यक्रम प्रमुख अतिथि तथा प्रतिष्ठानका संरक्षक मनोजजंग थापाले पाँच हजार नगद, सम्मानपत्र र दोसल्लासहित सिवाकोटीलाई सम्मान गरेका हुन् ।

सिन्धुलीमा सम्पन्न स्मृतिदिवस कार्यक्रममा प्रतिष्ठानकी अध्यक्ष निरु दर्लामीको अध्यक्षता थियो भने एमाले नेताहरु केन्द्रीय सदस्य गणेश कुमार पहाडी, कमलजंग राई, संघीय सांसद रणकुमारी बलम्पाकी लगायतको सहभागिता थियो ।

कार्यक्रमलाई सम्बोधन गर्दै नेताहरुले विशाल कुमारले जनयुद्धकालीन समयमा देखाएको आदर्श, निष्ठा र बलिदानलाई आगामी पुस्ताले मार्गनिर्देशनको रुपमा लिनुपर्नेमा जोड दिएका थिए । आयोजकले भने विधान महाधिवेशनको व्यस्तताले यस वर्षको स्मृतिदिवस कार्यक्रम केही संक्षिप्त बनेको स्वीकार गरेका छन् ।