सिन्धुली, १५ भदौ / नेपाली कांग्रेसको भातृ संगठन नेपाल तरुण दल गोलन्जोर गाउँपालिका समितिको अधिवेशन नजिकिँदै जाँदा यहाँको राजनीतिक सरगर्मी तीव्र बनेको छ। वडा अधिवेशन सम्पन्न भएसँगै आगामी भदौ २१ गते हुने गाउँपालिका अधिवेशनप्रति सबैको ध्यान केन्द्रित भएको हो।

गोलन्जोरका सात वटै वडामा सर्वसम्मत वडा समिति, गाउँपालिका अधिवेशन प्रतिनिधि र जिल्ला प्रतिनिधि चयन भइसकेपछि पालिका नेतृत्वप्रति आकांक्षीहरुको संख्या बढ्दो छ। तरुण दलका स्रोतका अनुसार हालसम्म गाउँपालिका अध्यक्ष पदका लागि चार जना आकांक्षी देखिएका छन्।

कांग्रेसका विभिन्न गुटको प्रतिनिधित्व गर्दै ग्वाल्टारका रामशरण कार्की, नाकाजोलीका हेम अस्थानी मगर, बलेनीका शशीबहादुर बिशुन्के र खुर्कोटका कविजंग थापा अध्यक्ष पदका दावेदार बनेका हुन्।

तरुण दलको आन्तरिक स्रोत अनुसार पुष्प कार्की, दौलत कार्की र मोतिराज समपकोटा समूहको समर्थनमा रामशरण कार्की र कविजंग थापा मैदानमा छन्। त्यस्तै रविन श्रेष्ठ समूहबाट शशीबहादुर बिशुन्के र हेम अस्थानी मगरको उम्मेदवारी देखिएको छ।

अध्यक्ष पदका चार आकांक्षीमध्ये रामशरण कार्की र शशीबहादुर बिशुन्के बलियो प्रत्याशीका रूपमा अघि बढिरहेका छन्। कार्कीलाई कांग्रेस जिल्ला सभापति उपेन्द्र पोखरेलसहित संस्थापन समूहको समर्थन रहेको छ भने बिशुन्केलाई कांग्रेस क्षेत्रीय सभापति र महाधिवेशन प्रतिनिधिहरुको बलियो साथ रहेको बताइएको छ।

स्रोतका अनुसार संस्थापन समूहले अध्यक्ष पदमा रामशरण कार्कीलाई अघि सार्ने तयारी गरेको छ। यसका लागि हेम अस्थानी मगर र कविजंग थापालाई ब्याक गराउने प्रयास भइरहेको बुझिएको छ। सोही क्रममा शशीबहादुर बिशुन्केलाई समेत कुनै पदमार्फत व्यवस्थापन गरेर सहमति खोज्ने पहल भइरहेको कांग्रेस निकट स्रोतले जनाएको छ।