सिन्धुली, १४ भदौ /  बनेपा–सिन्धुली–बर्दिबास (बीपी) राजमार्गअन्तर्गत पर्ने चियाबारी–खुर्कोट सुरुङ निर्माण कार्य छिटो अघि बढाउन सांसदहरूले माग गरेका छन्।

शनिबार सिन्धुली क्षेत्र नं. २ बाट निर्वाचित प्रतिनिधिसभा सदस्य लेखनाथ दाहाल (राजन) को नेतृत्वमा ७२ जना सांसदहरूले संयुक्त रूपमा भौतिक पूर्वाधार तथा यातायात मन्त्री देवेन्द्र दाहाललाई ध्यानाकर्षण गराएका हुन्।

सांसदहरूले बीपी राजमार्गको चियाबारी–खुर्कोट खण्ड साँघुरो र घुम्ती भएकाले दुर्घटना बढेको र मानवीय तथा भौतिक क्षति भइरहेको उल्लेख गर्दै तत्काल सुरुङमार्ग निर्माण गर्नुपर्ने माग गरेका हुन्।

सांसद दाहालका अनुसार सो खण्डको विस्तृत परियोजना प्रतिवेदन (डीपीआर) पूरा भइसकेको भए पनि बजेट व्यवस्थापन नहुँदा निर्माण कार्य अघि बढ्न सकेको छैन। उनले तत्काल रकम सुनिश्चित गरेर सुरुङ निर्माण सुरु गर्न आग्रह गरे।

वर्तमानमा २९.८ किमी लामो चियाबारी–खुर्कोट खण्ड साँघुरो, घुम्ती र भारवाहन क्षमता कमजोर भएकाले मालवाहक सवारीसाधन आवागमनमा समस्या हुने गरेको छ। यसले सिन्धुली, रामेछाप, काभ्रे, ओखलढुङ्गा, दोलखा, सोलुखुम्बु, सिन्धुपाल्चोकलगायत पूर्वी पहाडी जिल्लाका नागरिकलाई समय र खर्चमा ठूलो बोझ परिरहेको दाहालले बताए।

डीपीआरअनुसार सुरुङ बनेपछि हालको २९.८ किमी दूरी घटेर ८.५ किमी मात्र हुनेछ। अहिले एकदेखि डेढ घण्टा लाग्ने यात्रा सुरुङमार्गमार्फत ६ मिनेटमै छिचोल्न सकिने अनुमान गरिएको छ।

चियाबारी–खुर्कोट सुरुङ कमलामाई नगरपालिका–२ को चियाबारी माथि फेदीबाट सुरु भई गोलन्जोर गाउँपालिका–७ को तल्लो बारामा निस्कनेछ। सो सुरुङ निर्माणका लागि करिब १६ अर्ब ८१ करोड ८७ लाख रुपैयाँ लागत लाग्ने अनुमान गरिएको छ।