सिन्धुली, १३ भदौ / सिन्धुलीका फिक्कल, गोलञ्जोर र सुनकोशी गाउँपालिकाले खुर्कोटमा इलाका प्रशासन कार्यालय स्थापना गर्न माग गरेका छन्। यसका लागि स्थानीय तहका प्रमुखहरूले संयुक्त रूपमा जिल्ला प्रशासन कार्यालय सिन्धुलीमा ध्यानाकर्षण पत्र बुझाएका हुन्।

फिक्कल गाउँपालिका अध्यक्ष पार्वती सुनुवार, गोलन्जोर गाउँपालिका अध्यक्ष शंकर बराल र सुनकोशी गाउँपालिका अध्यक्ष दीपा बोहरा दाहालले प्रमुख जिल्ला अधिकारी दिनेश सागर भुसालमार्फत गृह मन्त्रालयलाई सिफारिस गर्न माग गरेका छन्। उनीहरूले नागरिकता लगायत प्रशासनिक सेवा लिन जिल्ला सदरमुकाम धाउनुपर्ने बाध्यता स्थानीयवासीको लागि असहज भएको भन्दै खुर्कोट उपयुक्त स्थान हुने तर्क प्रस्तुत गरेका छन्।

तीन पालिकाका जनतालाई दुरीका हिसाबले सदरमुकाम धाउन कठिन हुने भएकाले सेवा प्रवाहलाई सहज बनाउन गोलञ्जोर -७ खुर्कोटमा इलाका प्रशासन कार्यालय आवश्यक भएको उनीहरूको जिकिर छ।

नेपाल सरकारले मध्यपहाडी लोक मार्गसँगै विकास गरिरहेका दश नयाँ सहरमध्ये खुर्कोटलाई महत्त्वपूर्ण केन्द्रका रूपमा अघि सारेको छ। मध्यपहाडी लोकमार्ग र बिपी राजमार्ग दुवै यही स्थान हुँदै जाने भएकाले यातायात, विद्युत् र इन्टरनेट जस्ता पूर्वाधारमा सहज पहुँच रहेको, सहरीकरणसँगै जनघनत्व बढ्दो भएकाले सरकारी सेवा स्थापनाको लागि खुर्कोट उपयुक्त स्थान भएको ध्यानाकर्षण पत्रमा उल्लेख गरेका छन् ।

प्रशासन कार्यालय स्थापनासँगै गोलन्जोर, सुनकोशी र फिक्कल गाउँपालिकाका जनतालाई नजिकैबाट छिटो र सहज सेवा प्राप्त हुने अपेक्षा गरिएको छ। प्रमुख जिल्ला अधिकारी भुसालले पनि जिल्लाको भौगोलिक विकटता र जनघनत्वलाई आधार मानेर आवश्यक अध्ययन गरी प्रक्रिया अघि बढाइने प्रतिबद्धता जनाएका छन्।