सिन्धुली, १३ भदौ । संघीय मामिला तथा सामान्य प्रशासन मन्त्रालयले देशभरका गाउँपालिका र नगरपालिकालाई ‘निमित्त विहीन’ बनाएको छ। यसअन्तर्गत हिजो बिहिबार सिन्धुलीका सहायक प्रमुख जिल्ला अधिकारी अनुज भण्डारीलाई सप्तरीको कन्चनरुप नगरपालिकाको प्रमुख प्रशासकीय अधिकृतमा सरुवा गरिएको छ।

त्यसैगरी गृह मन्त्रालयका मानबहादुर बराल गोलन्जोर गाउँपालिकाको प्रमुख प्रशासकीय अधिकृतका रूपमा  आउने भएका छन्।

हरिहरपुरगढी गाउँपालिकामा सरुवा भएर पनि गाउँपालिका अध्यक्ष र कार्यपालिकाको असहमति वेगर भदौ ५ गते बिहिबार जबर्जस्ती हाजिरी गरेर काठमाडौँ फर्किएका अजम्बर राईलाई सुनकोशी गाउँपालिकामा पठाइएको छ। यता, स्वास्थ्य मन्त्रालय अन्तर्गत कार्यरत तुलसीराम आचार्यलाई हरिहरपुरगढी गाउँपालिकाको प्रमुख प्रशासकीय अधिकृतका रूपमा सरुवा गरिएको छ।

संघीय मामिला तथा सामान्य प्रशासन मन्त्रालयले यसपटक उपसचिव, शाखा अधिकृत, सचिव, उपशाखा अधिकृत तथा प्रमुख प्रशासकीय अधिकृतहरूको सरुवा गर्दै पालिकामा स्थायी नेतृत्व सुनिश्चित गरेको हो।

संघीय मामिला तथा सामान्य प्रशासन मन्त्री भगवती न्यौपानेले सामाजिक सञ्जालमार्फत देशभरका गाउँपालिका र नगरपालिकालाई ‘निमित्त विहीन’ बनाइएको घोषणा गरेकी छिन्। उनले भनिन्, “आजबाट देशभरिका गाउँपालिका र नगरपालिकालाई निमित्त विहीन बनाइएको जानकारी गर्दछु।”

उनका अनुसार आफूले मन्त्रालयको जिम्मेवारी सम्हाल्दा ७५३ पालिकामध्ये करिब २०० पालिकामा प्रमुख प्रशासकीय अधिकृत ‘निमित्त’का भरमा कार्यरत थिए। अहिले ती सबै पालिकामा स्थायी रूपमा प्रशासकीय अधिकृत तोकिएको उनको दाबी छ।

मन्त्री न्यौपानेले जिम्मेवारी पाएका कर्मचारीलाई दक्षता र इमानदारीसाथ काम गर्न आग्रह गर्दै पालिका प्रमुख तथा जनप्रतिनिधिलाई प्रमुख प्रशासकीय अधिकृतहरूको क्षमताअनुसार जिम्मेवारी दिन आग्रह गरेकी छिन्।

उनले थपेकी छिन्, उपमहानगर तथा महानगरपालिकालाई पनि क्रमशः ‘निमित्त विहीन’ बनाउने प्रक्रिया अघि बढाइनेछ।