सिन्धुली, १२ भदौ / प्राइम कमर्सियल बैंकको फिक्कल शाखाले नयाँ भवनबाट सेवा सुरु गरेको छ। यसअघि बैंकले लामो समयसम्म सुनकोसी माध्यमिक विद्यालयको भवन भाडामा लिएर सेवा सञ्चालन गर्दै आएको थियो।

वि.सं. २०७२ मा संघीय संविधान लागू भएपछि मुलुकमा संघीय संरचना सुरु भएको थियो। संविधानले स्थानीय तहको शासन सुदृढ पार्ने, सरकारी कारोबार व्यवस्थित गर्ने र वित्तीय पहुँच विस्तार गर्ने व्यवस्था गरेको छ। यही लक्ष्यअनुसार नेपाल राष्ट्र बैंकले सबै स्थानीय तहमा कम्तीमा एउटा वाणिज्य बैंकको शाखा स्थापना गर्ने नीति लागू गरेको थियो।

सामाजिक सुरक्षा भत्ता वितरण, विकास निर्माणका काममा नगदको सट्टा बैंकिङ्ग कारोबार बढाउने तथा स्थानीय तहको सरकारी कारोबारलाई बैंकमार्फत सञ्चालन गर्ने दृष्टिले पनि वाणिज्य बैंकको शाखा अपरिहार्य ठहरिएको थियो। यसै नीति र योजनाअन्तर्गत नेपाल राष्ट्र बैंकले २०७४ चैतमा सबै स्थानीय तहमा वाणिज्य बैंकको शाखा स्थापना गर्न निर्देशन जारी गरेको थियो।

यसै अभियानअन्तर्गत फिक्कल गाउँपालिकाको केन्द्र खाङसाङमा २०७५ सालमा प्राइम कमर्सियल बैंकको शाखा स्थापना भएको हो । शाखाले स्थापना कालदेखि नै सुनकोसी माध्यमिक विद्यालयको भवनमार्फत सेवा दिँदै आएको थियो। तत्कालीन अवस्थामा पक्की भवनको अभाव र सुरक्षा कारणले विद्यालय भवन उपयुक्त रहेको शाखा प्रबन्धक जनकण्ठ श्रेष्ठले बताए।

हाल शाखा मध्यपहाडी राजमार्ग छेउमा रहेको नयाँ भवनमा स्थानान्तरण भएको छ। नयाँ भवन सुविधा सम्पन्न र पहुँचयोग्य भएकाले सेवाग्राहीले सहज र सुरक्षित तरिकाले बैंकिङ्ग कारोबार गर्न सक्ने शाखा प्रबन्धक जनकण्ठ श्रेष्ठले माईशिर डटकमलाई जानकारी दिए ।

फिक्कल गाउँपालिका मात्र नभई ओखलढुंगाको चम्पादेवी र सुनकोशी गाउँपालिका तथा उदयपुरको घुर्मी क्षेत्रका ग्राहकले पनि यस शाखाबाट सेवा लिइरहेका छन् । साथै गाउँपालिकाको वडा–वडा पुगेर सामाजिक सुरक्षा भत्ता वितरण गर्दै आएका छौं । नयाँ भवनबाट सेवाग्राहीले अझ प्रभावकारी र सहज सेवा पाउनेछन्।” शाखा प्रबन्धक श्रेष्ठले भने।