सिन्धुली, १२ भदौ /  यात्रुको यात्रा सुरक्षित र सहज बनाउन सिन्धुलीको गोलन्जोर गाउँपालिका–७, खुर्कोट तल्लो बजारमा निर्माण गरिएको रिफ्रेस सेन्टर अर्थात् आरामस्थल एक वर्षपछि पुनः सञ्चालनमा आएको छ।

बीपी राजमार्ग साँघुरा सडक, घुमाउरा मोड र लामो यात्राका कारण चालकहरू थकित भई दुर्घटनाको जोखिम बढ्ने समस्या समाधानका लागि २०७५ सालमा जिल्ला ट्राफिक प्रहरी कार्यालय सिन्धुलीले यो आरामस्थल स्थापना गरेको थियो।

 तर, गतवर्ष २०८१ असोज ११ गतेको  सुनकोशी नदिमा आएको बाढीले भौतिक संरचना क्षतिग्रस्त भएपछि सेन्टर बन्द भएको थियो। स्थानीय तह र सरोकारवाला निकायको पहलमा मर्मत–सम्भारपछि बुधवार औपचारिक कार्यक्रममार्फत पुनः सञ्चालनमा ल्याइएको हो।

कार्यक्रमका प्रमुख अतिथि प्रमुख जिल्ला अधिकारी दिनेश सागर भुषालले सेन्टर उद्घाटन गर्दै यसलाई अझ व्यवस्थित र सुरक्षित बनाउन प्रशासन र स्थानीय तह निरन्तर सहयोग गर्ने प्रतिबद्धता व्यक्त गरे।

सडक दुर्घटनासम्बन्धी तथ्यांकअनुसार सिन्धुली बागमती प्रदेशमा चौथो जोखिमयुक्त जिल्ला भएकाले यहाँ रिफ्रेस सेन्टर स्थापना गरिएको थियो। जिल्ला ट्राफिक प्रहरी कार्यालय सिन्धुलीका प्रमुख प्रहरी निरीक्षक मोहम्मद कलिम अन्जुमका अनुसार चालक र यात्रुले १५–२० मिनेट विश्राम लिएर मात्र यात्रा निरन्तरता दिँदा दुर्घटना न्यूनीकरणमा उल्लेख्य सफलता हासिल भएको थियो । उनले  यात्रुवाहक सबै सवारी चालकले सेन्टरमा विश्राम गरेर मात्र यात्रा अगाडि बढाउनुपर्नेमा जोड दिए।

उद्घाटन कार्यक्रममा प्रहरी उपरीक्षक लालध्वज सुवेदी, गाउँपालिका उपाध्यक्ष ज्वाला प्रसाद न्यौपाने, राष्ट्रिय अनुसन्धान विभागका जिल्ला प्रमुख सुदीप अधिकारी, सहायक प्रजिअ सुवर्ण पोख्रेल, शसस्त्र प्रहरीबल सिन्धुलीका प्रहरी नायव उपरीक्षक सुवर्ण पोखरेल, इलाका प्रहरी कार्यालय सिन्धुलीका प्रमुख प्रहरी निरीक्षक बसन्त भुजेललगायतको उपस्थिति थियो।