सिन्धुली, भदौ १० – सदरमुकाम धाउनुपर्ने बाध्यता अन्त्य गर्न गृह मन्त्रालयले देशभर २३ नयाँ इलाका प्रशासन कार्यालय खोल्ने निर्णय गरेको छ । यसअन्तर्गत सिन्धुलीको दुधौलीमा समेत इलाका प्रशासन कार्यालय स्थापना हुने भएको छ । यो कदमले जिल्लाका कमलाखोंच र तीनपाटन क्षेत्रका नागरिकलाई प्रत्यक्ष सुविधा पुग्ने भएको छ ।

दुधौली नगरपालिका–४ डकाहा बजारमा कार्यालय रहनेछ । यस कार्यालय स्थापनासँगै दुधौली नगरपालिकाका १४ वडासहित, कमलामाई नगरपालिकाका ३ वडा (रानीवास र भीमान), तथा तीनपाटन गाउँपालिकाका  बेलघारी, लंगुरखोला, चक्मके, आम्बोटे र बाहुन तिल्पुङलगायत क्षेत्रका नागरिकले प्रत्यक्ष सेवा पाउनेछन् । अहिलेसम्म यी क्षेत्रका स्थानीयलाई नागरिकता, राहदानी, राष्ट्रिय परिचयपत्रजस्ता सेवा लिन सदरमुकामसम्म पुग्नुपर्दा समय र खर्च दुबैको ठूलो बोझ पर्ने गरेको थियो ।

गृह मन्त्रालयले संगठन तथा व्यवस्थापन सर्वेक्षण (ओएन्डएम) प्रतिवेदनका आधारमा मन्त्रालयकै दरबन्दीभित्र मिलाएर नयाँ कार्यालय खोल्ने प्रस्ताव मन्त्रिपरिषद्मा पेश गरेको हो । सोमबार बसेको मन्त्रिपरिषद बैठकले गृह मन्त्रालयको प्रस्तावलाई स्वीकृत गर्दै प्रशासन समितिमा पठाइसकेको छ