सिन्धुली, ०९ भदौ । सिन्धुली निर्माण व्यवसायी संघको ९औं अधिवेशनबाट माओवादीसम्बद्ध उद्धव प्रसाद दाहाल अध्यक्षमा निर्वाचित भएका छन्। उनले १२९ मत प्राप्त गर्दै कांग्रेस निकट तुलसीनाथ श्रेष्ठलाई पराजित गरेका हुन्। श्रेष्ठले ८१ मत मात्र पाएका थिए। अघिल्लो अधिवेशनमा भने श्रेष्ठले दाहाललाई ३ मतले हराएका थिए। यसपालि दाहालले अघिल्लो हारको बदला लिदै संघको नेतृत्व सम्हाल्न सफल भएका हुन्।

यो अधिवेशनमा एमालेको आन्तरिक निर्णयले पनि निकै चासो पाएको थियो। एमाले जिल्ला नेतृत्वले केन्द्रीय सत्ता समीकरण अनुसार कांग्रेस निकट तुलसीनाथ श्रेष्ठलाई समर्थन गर्ने निर्णय गरे पनि त्यसलाई व्यवहारमा कार्यान्वयन गर्न सकेन। उल्टै, एमालेसम्बद्ध धेरैजसो व्यवसायीहरू दाहाल पक्षमै लागे। नयाँ व्यवसायीहरूको सक्रिय सहभागिता र कांग्रेसभित्रको असन्तुष्ट धारलाई आफूतर्फ तानेर दाहालले निर्णायक विजय हासिल गरेका हुन्। यससँगै लामो समयदेखि संघमा रहेको कांग्रेसको वर्चस्व टुटेको छ।

अध्यक्षसहित दाहाल पक्षका अधिकांश उम्मेदवार पदाधिकारीतर्फ पनि विजयी भएका छन्। प्रथम उपाध्यक्षमा फडिन्द्र पोखरेल १०४ मतसहित निर्वाचित भए भने उनका प्रतिस्पर्धी तेजबहादुर श्रेष्ठले १०२ मत पाए। द्वितीय उपाध्यक्षमा दिनेश दाहाल १३४ मत प्राप्त गरी विजयी भए भने उनका प्रतिस्पर्धी रमेश कुँवर ६९ मतमा सीमित भए। महासचिवमा श्रीलाल माझी निर्विरोध निर्वाचित भएका थिए।

कोषाध्यक्षमा रुमबहादुर राई १३६ मतसहित विजयी भए भने दिल्लीबहादुर श्रेष्ठले ७१ मत पाए। सचिवमा किरणराज लामा १०८ मत ल्याएर निर्वाचित भए भने पवन कटुवाल ९२ मतमा पराजित भए। सह–कोषाध्यक्षमा श्रेष्ठ समुहका चन्द्रप्रकाश श्रेष्ठ १२२ मत प्राप्त गरी विजयी भए भने दाहाल समुहका मनोजकुमार स्याङ्तान ९१ मतमा सीमित भए।

सदस्यतर्फ कुशल पोखरेल, दीपककुमार थापा, धनबहादुर थिङ, मदनबहादुर खड्का र सूर्यबहादुर तामाङ विजयी भएका छन्। महिला सदस्यमा सरिता राईले १६१ र सुनीता गजुरेलले १३० मत प्राप्त गरी निर्वाचित भए। जनजाति सदस्यतर्फ टेबहादुर मानन्धर र युगबहादुर योञ्जन विजयी भए भने दलित सदस्यमा डम्बर बराइली यसअघि नै निर्विरोध निर्वाचित भइसकेका थिए।

यसरी ९औं अधिवेशनले दाहाललाई संघको नेतृत्वमा चयन गर्दै कांग्रेसको लामो वर्चस्वलाई अन्त्य गरेको छ।