सिन्धुली, १७ साउन  — जिल्लामा निजी स्वास्थ्य सेवा क्षेत्रमा सक्रिय व्यवसायीहरूको साझा संस्था निजी स्वास्थ्य व्यवसायी संघ, सिन्धुली गठन गरिएको छ। शनिबार सिन्धुलीमाढीमा सम्पन्न व्यवसायीहरूको प्रथम भेलाले केशव प्रसाद देवकोटाको संयोजकत्वमा ९ सदस्यीय तदर्थ समिति गठन गरेको हो।

संघको सहसंयोजकमा सर्मिला माझी, सचिवमा हरिकुमार श्रेष्ठ र कोषाध्यक्षमा ताराबिक्र थापा चयन भएका छन्। यस्तै सदस्यहरूमा भुवन राई, डा. जगदिश कार्की, सरोज गिरी, जयराम काफ्ले र बब्लु चौधरी रहेका छन्।

संघ गठनको उद्देश्य निजी स्वास्थ्य व्यवसायीहरूबीच एकता, समन्वय र सहकार्य स्थापित गर्दै स्वास्थ्य सेवा क्षेत्रको गुणस्तर वृद्धि, सेवा प्रवाहलाई व्यवस्थित बनाउने र व्यवसायीहरूको हक–हितको संरक्षण गर्ने रहेको छ।

संस्थाको संरचना र सञ्चालनलाई औपचारिक बनाउने लक्ष्यसहित विधान निर्माणका लागि केशव प्रसाद देवकोटाको संयोजकत्वमा विधान मस्यौदा समिति पनि गठन गरिएको छ। समितिमा डा. जगदिश कार्की, माधव देवकोटा, हरिकुमार श्रेष्ठ र रविनमबन श्रेष्ठ सदस्य रहेका छन्।

संघले अबको चरणमा सदस्यता विस्तार, विधान पारित र दर्ता प्रक्रिया अघि बढाउने तयारी गरिरहेको संयोजक देवकोटाले जानकारी दिए।