सिन्धुली, १५ साउन — माओवादी पार्टीका सांसद राजन दाहालका विश्वास पात्रका रूपमा परिचित टिकाराम स्याङ्तानको मोटरसाइकल चोरी मुद्दामा पक्राउ र जेल चलान भएपछि पार्टी नेतृत्व मौन देखिएको छ। यो मौनता सामाजिक सञ्जाल र स्थानीय जनमानसमा शंकास्पद रुपमा लिइएको छ।

मरिण गाउँपालिका–४ का वडा अध्यक्ष तथा माओवादी युवा नेता टिकाराम स्याङ्तानलाई तीन वर्षअघि दर्ता भएको मोटरसाइकल चोरीको अभियोगमा उच्च अदालत पाटनले दोषी ठहर गरेको थियो। लामो समय फरार रहेका उनलाई सिन्धुली प्रहरीले पक्राउ गरी जिल्ला अदालतमा पेश गरेको थियो। अदालतको आदेशअनुसार उनलाई कारागार चलान गरिएको छ।

स्याङ्तान सांसद दाहालका नजिकका विश्वास पात्र मानिन्छन्। उनी प्रायः सांसद दाहालसँगै पार्टीका कार्यक्रमहरूमा देखिन्थे र स्थानीय राजनीतिमा उनीहरूको प्रभावशाली उपस्थिति रहेको छ।

तर, स्याङ्तान पक्राउ परेपछि सांसद दाहाल र पार्टी नेतृत्वबाट सार्वजनिक प्रतिक्रिया नआएपछि स्थानीय जनमानसमा चिन्ता बढेको छ। जनमतमा यो मौनतालाई नेतृत्‍वले अपराधमा संलग्न विश्वास पात्रलाई बचाउन खोजेको संकेतका रूपमा लिइएको छ।

एक स्थानीय नागरिकले भने,
“सांसदको नजिकको मान्छे जेलमा पर्दा पनि नेताले चुप लाग्नुले जनतामा विश्वास घट्छ। पार्टीले स्पष्टता दिनुपर्छ।”

डिएसपी सूर्यप्रकाश सुवेदीले भने,
“कानुनको शासन सबैका लागि एक हुनुपर्छ। अदालतको फैसलाअनुसार कारबाही गरिएको हो।”

अब प्रश्न उठेको छ कि सांसद दाहाल र माओवादी पार्टीले यो घटनामा के भूमिका खेल्नेछन्। पार्टी नेतृत्वले विश्वास पात्रमाथि लिने कदमले पार्टीको छवि कस्तो असर पार्नेछ। राजनीतिक संरक्षण र कानुनको शासनबीचको द्वन्द्वले आगामी दिनमा कस्तो रुप लिनेछ भन्ने विषय सबैको ध्यानाकर्षणको केन्द्रमा छ।