काठमाडौं । काठमाडौंबाट एक युवकलाई भारतको पटनामा लगेर बन्धक बनाएको आरोपमा प्रहरीले सिन्धुली र सिन्धुपाल्चोकका दुई जना पक्राउ गरेको छ ।

पक्राउ पर्नेमा सिन्धुलीको सुनकोशी गाउँपालिका घर भई हाल भक्तपुर बस्ने २४ वर्षीय राजकुमार अच्छामी र सिन्धुपाल्चोक घर भई पर्सामा बस्दै आएका ४५ वर्षीय रेशमबहादुर खत्री रहेका छन् । उनीहरूलाई साउन ५ गते वीरगन्ज र बल्खुबाट पक्राउ गरी आज सार्वजनिक गरिएको मानव बेचबिखन ब्युरोका एसपी रुगम कुँवरले जानकारी दिए ।

प्रहरीका अनुसार यी दुवैले पीडितलाई “३५ हजार भारतीय रुपैयाँ तलब आउने काम छ” भनेर वैशाख १९ गते पटना नजिकै लगेका थिए । तर त्यहाँ पुगेपछि ‘वेल स्टार डाइनामिक कम्पनी’मा तालिमको नाममा १० हजार भारतीय रुपैयाँ असुल्ने र त्यसपछि नेटवर्किङ व्यवसायमा लगानी गर्न भन्दै थप २ लाख भारतीय रुपैयाँ मागेर बन्धक बनाएको खुलासा भएको छ ।

बन्धक अवस्थामा राखेर नेपालबाट थप व्यक्तिहरू बोलाउन दबाब दिइएको र यस्तो दबाब सहन नसकेपछि पीडित भागेर नेपाल फर्किएको प्रहरीले जनाएको छ । पटनासहित मुजफ्फरपुर क्षेत्रमा यसरी नेपालीहरूलाई जबरजस्ती नेटवर्किङ कम्पनीको नाममा आर्थिक तथा श्रम शोषण गरिने गरेको एसपी कुँवरको भनाइ छ ।

प्रहरीको अनुसन्धानअनुसार, तालिम लिनेहरूलाई सुरुमा सुटको कपडा दिएर नयाँ ग्राहक ल्याउन बाध्य पारिने र लगानी बढाउन दबाब दिने गरिन्छ । अहिले पक्राउ परेका अच्छामी र खत्रीविरुद्ध मानव बेचबिखन तथा ओसारपसारसम्बन्धी कसूरमा ५ दिनको म्याद थपेर अनुसन्धान भइरहेको प्रहरीले जनाएको छ ।