सिन्धुली, असार २१ / करदाता सेवा कार्यालय सिन्धुलीले कर र राजस्व सम्बन्धी सरोकारवालासँग अन्तरक्रिया गर्दै कर नबुझाउने वा छल्नेहरूलाई कडा कानुनी कारबाहीको चेतावनी दिएको छ।

शनिबार सिन्धुलीमाढीमा आयोजित कार्यक्रममा प्रमुख मनोजकुमार न्यौपानेले आयकर, मूल्य अभिवृद्धि कर, प्यान दर्ता तथा नवीकरण, र कर प्रशासनको डिजिटल प्रणालीबारे जानकारी गराए। उनले करदाताले व्यवसाय दर्ता अनिवार्य गरी सञ्चालन गर्न, कर विवरण समयमै बुझाउन र आवश्यक कागजात व्यवस्थित राख्न आग्रह गरे।

उनका अनुसार सिन्धुलीमा हाल १७ हजार २ सय ६४ व्यक्तिगत प्यान मध्ये १७ हजार २ सय ५३ सक्रिय छन् भने १७ हजार ४ सय ३५ व्यवसायिक प्यान मध्ये १६ हजार ५४ सक्रिय रहेका छन्। त्यस्तै, १ हजार ९ सय ९५ मूल्य अभिवृद्धि कर दर्तामध्ये १ हजार ६ सय ९७ सक्रिय रहेका छन्।

न्यौपानेले आर्थिक वर्ष समाप्त भएपछि तीन महिनाभित्र आय विवरण बुझाउनुपर्ने र साउन महिनाभित्र नवीकरण गर्दा जरिवाना नलाग्ने, तर त्यसपछि क्रमशः २५, ५०, ७५ र १०० प्रतिशतसम्म जरिवाना लाग्ने व्यवस्था रहेको स्पष्ट पारे।

इजाजतबिना करयोग्य वस्तु वा सेवा सञ्चालन गरेमा सामान जफत हुने, जरिवाना तिर्नुपर्ने र एक वर्षसम्म कैद सजाय समेत हुन सक्ने कानुनी प्रावधान रहेको जानकारी दिँदै उनले समयमा प्यान दर्ता, नवीकरण र विवरण अद्यावधिक गर्न, अभिलेख सुरक्षित राख्न र शंका लागेमा कार्यालयसँग परामर्श लिन अनुरोध गरे।

कार्यक्रममा सहभागी करदाताहरूले प्यान नवीकरण, अनलाइन प्रणालीको सहजता, कर दरबारे अन्योल र व्यवहारिक समस्या उठाएका थिए। सहभागीहरूले यस्ता कार्यक्रम नियमित गर्नुपर्ने सुझावसमेत दिएका थिए।