सिन्धुली, १५ असार । मोरङतर्फ जाँदै गरेको भ्यानबाट लागू औषधसहित एक जना पक्राउ परेका छन्।

इलाका प्रहरी कार्यालय भिमान र लागू औषध नियन्त्रण ब्युरोको संयुक्त टोलीले २०८२ असार १४ गते भिमान चेकपोइन्टमा काठमाडौँबाट मोरङतर्फ गइरहेको बागमती प्रदेश ०३–००१ ख ३३६१ नम्बरको भ्यान जाँचका क्रममा लागू औषध ट्रामाडोल बरामद गरेको हो।

जिल्ला प्रहरी कार्यालय सिन्धुलीका प्रवक्ता प्रहरी नायब उपरीक्षक (डिएसपी) सूर्यप्रकाश सुवेदीका अनुसार मोरङको पोखरी नगरपालिका–४ घर भएका अन्दाजी ४० वर्षीय दुर्गाप्रसाद श्रेष्ठको साथबाट ट्रामाडोल फेला परेको हो।

डिएसपी सुवेदीले भने, “उनको साथबाट ट्रामाडोल बरामद भएको छ। लागू औषध ओसारपसारमा संलग्न आशंकामा उनलाई नियन्त्रणमा लिइएको छ, थप अनुसन्धानका लागि असार १५ गते सिन्धुली जिल्ला अदालतबाट म्याद थप लिइएको छ।”

हाल पक्राउ परेका श्रेष्ठमाथि इलाका प्रहरी कार्यालय भिमानबाट आवश्यक अनुसन्धान भइरहेको प्रहरीले जनाएको छ।