काठमाडौँ,२१ जेठ २०८२ । बर्खा लागेसँगै बीपी राजमार्गमा सवारी सञ्चालन कठिन हुन थालेको छ ।

गत असोजमा आएको बाढीबाट क्षतिग्रस्त बीपी राजमार्गमा बर्खा लागेसँगै सवारी सञ्चालनमा समस्या हुन थालेको हो । बीपी राजमार्गको क्षतिग्रस्त खण्डमा जसो तसो खोला तर्काएर सवारी साधन सञ्चालन गर्न थालिएको छ । हिउँद याममा खोलाबाट नै सवारी साधन सञ्चालन गर्ने गरिएकोमा बर्खा लागेसँगै भित्ता साईडमा गेग्रान र ठुला ढुंगा राखेर अस्थायी सडक बनाईएको छ । हाल सोही सडक भएर सवारी सञ्चालन भईरहेको छ ।

बीपी राजमार्ग अन्र्तगत काभ्रेको चौकीडाँडामा दुर्घटनाको जोखिम बढेको छ । पूर्वबाट काठमाडौँतर्फ जाँदा ठाडो उकालो सडक भएकाले दुर्घटनाको जोखिम बढेको हो । उकालो सडकका कारण दुर्घटना हुने गरेको प्रहरीले जनाएको छ । सो उकालोमा सडकको ग्रेड नमिलेकाले सुधारको काम भईरहेको भक्तपुर डिभिजन सडक कार्यालयका ईन्जिनियर दुर्गा प्रसादले जानकारी दिनुभयो ।

गत असोजमा आएको बाढी पहिरोले काभ्रे भञ्ज्याङ–नेपालथोक खण्डको ११ किलोमिटर सडकमा ठुलो क्षति गरेको थियो । कालोपत्रे सडक बाढीले बगाएपछि त्यसकै तलबाट अस्थायी सडक बनाएर सवारी सञ्चालन गरिएको हो । क्षति भएको खण्डसहित बीपी लोकमार्गको २८ किमी सडकलाई चार वटा प्याकेजमा विभाजन गरेर ठेक्का गरिएको छ ।