सिन्धुलीमाढी, २० जेठ २०८२ ।  संयीय सरकारबाट आगामी आर्थिक वर्ष २०८२/ ०८३ मा सिन्धुलीका ९ सथानीयतहलाई  ४ अर्ब ९ करोड बढी वित्तीय हस्तान्तरण मार्फत बजेट विनियोजन भएकोे छ । आर्थिक वर्ष २०८२/०८३ का लागि गरिएको बजेट भाषण मार्फत उक्त बजेट विनियोजन गरिएको हो । संघीय सरकारले वित्तीय हस्तान्तरण अन्तर्गत वित्तीय समानीकरण, सशर्त, विशेष र समपूरक अनुदान प्रदेश तथा स्थानीय तहलाई पठाउने गरिएको छ ।

सरकारले वित्तीय समानीकरण, सशर्त, विशेष र समपूरक अनुदान गरी चार शीर्षकमा ४ अर्ब ९ करोड ७ लाख बजेट विनियोजन गरेको हो । सरकारले सिन्धुलीका २ नगरपालिकामा कुल १ अर्ब ४१ करोड ३९ लाख बजेट प्रदान गरेको छ। भने  ७ गाउँपालिकालाई २ अर्ब ६७ करोड ३८ लाख रकम विनियोजन गरेको छ ।

सिन्धुलीले सबैभन्दा बढी सशर्त अनुदान बापत २ अर्ब ८८ करोड ७१ लाख बजेट पाउने भएको छ । सरकारले चालुतर्फ ३ अर्ब ७९ करोड ६० लाख र पुँजीगततर्फ २९ करोड ४७ लाख गरी सो बराबरको रकम विनियोजन गरेको हो ।

यस्तै, जिल्लामा वित्तीय समानीकरण बापत १ अर्ब १ करोड ९६ लाख अनुदान आउने भएको छ । त्यसमध्ये पनि न्यूनतम अनुदान बापत ४० करोड ५० लाख, सूत्रमा आधारित अनुदान बापत ५६ करोड ८९ लाख र कार्यसम्पादनमा आधारित अनुदान बापत ४ करोड ५७ लाख बजेट विनियोजन भएको छ ।

समपूरक अनुदान बापत ७ करोड र विशेष अनुदान बापत ११ करोड ४० लाख बजेट विनियोजन भएको छ । विशेष अनुदान बापत भने चालुतर्फ ७ करोड ९२ लाख र पुँजीगततर्फ ३ करोड ४८ लाख रहेको छ ।

सिन्धुलीले ३ अर्ब ७९ करोड ६० लाख र पुँजीगततर्फ २९ करोड ४७ लाख गरी ४ अर्ब ९ करोड ७ लाख अनुदान पाउने भएको हो । चार अनुदानमध्ये समपूरक अनुदान बाहेक अन्य अनुदानको रकम पुँजीगत भन्दा चालुतर्फ बढी हुने गरेको छ ।

कमलामाईमा समपूरक बजेट शून्य!

सिन्धुलीका ९ स्थानीय तह मध्य कमलामाई नगरपालिकाले सबैभन्दा बढी अनुदान पाउने भएको छ । आगामी आर्थिक वर्षका लागि सरकारले विनियोजन गरेको अनुदानबापत सबैभन्दा बढी ७५ करोड ४९ लाख बजेट पाउने भएको हो । त्यसमध्ये सबैभन्दा बढी सशर्त अनुदान बापत ५६ करोड ५५ लाख वित्तीय समानीकरण बापत १८  करोड ५ लाख, विशेष अनुदान बापत ८९ लाख बजेट पाउनेछ । भने कमलामाईले समपूरक बजेट नपाउने भएको छ ।

त्यस्तै दुधौली नगरपालिकाले ६६ करोड २० लाख अनुदान पाउने भएको छ ।  समानीकरणतर्फ १६ करोड ९२ लाख, सशर्त तर्फ ४७ करोड २० लाख, विशेषतर्फ ७४ लाख र समपूरकतर्फ १ करोड ३४ लाख प्राप्त गर्ने भएको छ ।

गाउँपालिकातर्फ तीनपाटनमा बढी

जिल्लाको तीनपाटन गाउँपालिकाले ५४ करोड ८३ लाख अनुदान पाउने भएको छ । तीनपाटनले सशर्त अनुदान बापत ४१ करोड २१ लाख, समनीकरण बापत १२ करोड १७ लाख समपूरक अनुदान बापत ६० लाख र विशेष तर्फ ५४ करोड ८३ लाख अनुदान पाउने भएको हो ।

यसैगरी, गोलन्जोर गाउँपालिकाका लागि ३४ करोड ३४ लाख बजेट विनियोजन भएको छ । गोलन्जोरले सशर्त तर्फ २४ करोड ३२ लाख, समानीकरणतर्फ ७ करोड ७५ लाख, समपूरकतर्फ ६० लाख तथा विशेषतर्फ ६७ लाख अनुदान पाउनेछ । घ्याङलेख गाउँपालिकाले समानीकरण बापत ७ करोड २९ लाख, सशर्त तर्फ १५ करोड २५ लाख, समपूरक तर्फ ९१ लाख गरी कुल २३ करोड ४५ लाख बजेट पाउने सरकारको अन्तर सरकारी वित्तीय हस्तान्तरण विवरणमा उल्लेख छ । घ्याङलेख गाउँपालिकालाई यसवर्ष विशेष अनुदान दिएको छैन ।

जिल्लाको फिक्कल गाउँपालिकाले पनि ३४ करोड ४२ लाख बराबरको अनुदान प्राप्त गरेको छ । समनीकरणतर्फ ८ करोड ९ लाख, सशर्त तर्फ २४ करोड, विशेषतर्फ १ करोड ६५ लाख र समपूरकतर्फ ६८ लाख बजेट विनियोजन भएको छ ।

त्यस्तै सरकारले मरिण गाउँपालिकालाई ४६ करोड ९२ लाख अनुदान रकम विनियोजन गरेको छ । जसअनुसार सशर्त तर्फ ३१ करोड १३ लाख पाउँदा समनीकरणतर्फ १० करोड ६७ लाख, समपूरकमा ९७ लाखा प्राप्त गरेको मरिणले ३ करोड ९५ लाख विशेष अनुदान पाएको छ ।

यता सुनकोशी गाउँपालिकाले २४ करोड ४५ लाख सशर्त, ९ करोड १ लाख समानिकरण अनुदान, १ करोड विशेष अनुदान र ९७ लाख समपूरक सहित कुल ३५ करोड ४३ लाख बजेट प्राप्त गरेको छ । भने, हरिहरपुरगढी गाउँपालिकाले ३७ करोड ९९ लाख बजेट पाएको छ । जसमा १० करोड ८१ लाख समानीकरण, २४ करोड ६० लाख सशर्त अनुदान, ९३ लाख समपूरक र १ करोड ६५ लाख विशेष अनुदान पाएको अर्थ मन्त्रालयले जनाएको छ ।