सिन्धुली । सिन्धुलीको गोलन्जोर गाउँपालिकामा निर्माणाधीन ३ वटा स्वास्थ्य चौकी भवनको अनुगमन गरिएको छ । गाउँपालिकाको घोक्सिला, किराते र तीनकन्यामा निर्माण भैरहेको स्वास्थ्य चौकी भवनको गाउँपालिकाका अध्यक्ष शंकरराज बराल सहितको प्राविधिक टालिले निमार्ण कार्यको अनुगमन गरेको हो ।

ब्याक टु लाइफ इ भी जर्मनी नामक अन्तर्राष्ट्रिय गैरसरकारी संस्थाको ४ करोड ७१ लाख रुपैयाँ बराबरको लागतमा स्वास्थ्य चौकी निर्माण थालिएको हो । ब्याक टु लाइफको यस परियोजनाका स्थानीय साझेदार संस्था समुदाय पद्धति विकास सेवा नामक गैरसरकारी संस्था रहेको छ ।

पालिकाका अध्यक्ष बरालले भवन निर्माणपछि उक्त स्वास्थ्य चौकी लाई आवश्यक पर्ने उपकरण जडान गरी गोलन्जोर गाउँपालिकालाई हस्तान्तरण हुने र गाउँपालिकाले स्वास्थ्य चौकी सञ्चालन गर्ने बताए ।

भवन निर्माणसँगै यहाँका नागरिकलाई सहज र गुणस्तरीय स्वास्थ्य सेवामा सहयोग पुग्ने विश्वास गरिएको छ ।