सिन्धुली । सिन्धुलीको गोलन्जोर गाउँपालिका ४ तीनकन्या खोक्लिङमा बुधवारबाट अध्यक्ष कप फुटबल प्रतियोगिता ‘२०८१’ सुरु भएको छ । प्रतियोगिताको उद्घाटन गाउँपालिकाका अध्यक्ष शङ्कर बरालले रेफ्री सुनाम भुजेललाई फुटबल हस्तान्तरण गरेर सुरु गरेका हुन् ।

उद्घाटन समारोहलाई सम्बोधन गर्दै पालिकका अध्यक्ष बरालले खेलमा जीत भन्दा पनि अनुशासन महत्त्वपूर्ण भएकाले अनुशासित भएर खेल्न प्रतियोगितामा सहभागी खेलाडीलाई आग्रह गरे ।

उद्घाटन खेलको पहिलो हाफसम्म बराबरी रहेको खेलको अन्तिम समयमा नवीन पुलामीले गोल गरेसँगै वडा नं ६ लाई १ गोलले पराजित गरेर वडा नं ४ विजय भएको छ ।

प्रतियोगिताबाट प्रथम स्थान हासिल गर्ने टिमलाई ६२ हजार ५ सय, द्धितिय हुने टिमलाई ३७ हजार ५ सय र तृतीयलाई २५ हजार पुरस्कार प्रदान गरिने छ ।

साथै, उत्कृष्ट गोल कर्ता, उत्कृष्ट गोल रक्षक र उत्कृष्ट खेलाडी लाई तीन / तीन हजार पुरस्कारको साथमा प्रमाणपत्र प्रदान गरिने छ । पालिकाको ७ वटा वडा र १ कर्मचारीको टिम गरी खेलमा ८ वटा टिम को सहभागिता रहेको छ ।

गोलन्जोर गाउँपालिकाको खेलकुद विकास समितिको आयोजनामा सुरु भएको प्रतियोगिताको २९ गते शुक्रवार फाइनल खेल सँगै समापन गरिने छ ।