सिन्धुली, ८ चैत । अखिल क्रान्तिकारी सिन्धुलीले विनोद कुमार कार्कीलाई सङ्गठनबाट निष्कासन गरेको छ । कार्कीले सिन्धुली बहुमुखी क्याम्पसमा भोलि शनिवार (चैत ९ गते) हुने निर्वाचनमा अध्यक्ष पदमा स्वतन्त्र उम्मेदवारी दिएको भन्दै अखिल क्रान्तिकारी जिल्ला समिति सिन्धुलीले साधारण सदस्यसमेत नरहने गरी कार्कीलाई सङ्गठनबाट निष्कासन गरेको हो ।

जिल्ला अध्यक्ष सुमन रानाद्वारा जारी विज्ञप्तिमा भनिएको छ, ‘भोलि हुन गइरहेको स्ववियु निर्वाचनलाई मध्यनजर गर्दै संयुक्त प्यानल बनाई निर्वाचनमा सहभागी हुने अनेरास्ववियु र अखिल क्रान्तिकारी सिन्धुलीको निर्णय अनुसार सहमति कार्यान्वयन भई मनोनयन पत्र दर्ता गर्ने कार्यक्रम सम्पन्न भइसकेको छ । यसै विषयलाई लिएर सिन्धुली बहुमुखी क्याम्पसमा अखिल क्रान्तिकारीका नेता विनोद कुमार कार्कीले सङ्गठनको निर्णय विपरीत स्वतन्त्र ढंगले अध्यक्ष पदमा उम्मेदवारी दिएको र पटक पटक संगठन र पार्टी नेतृत्वको अनुरोध लाई समेत कुनै प्रवाह नगरी अटेर गरेकाले साधारण सदस्य समेत नरहने गरी सङ्गठनबाट निष्कासन गरिएको छ ।’

तुलसीराम भुजेल अध्यक्ष र विष्णु पाण्डे सचिवको नेतृत्वमा रहेको संयुक्त प्यानललाई मतदान गर्न क्रान्तिकारीले अपिल गरेको छ ।