सिन्धुली । प्रहरीले सिन्धुलीबाट लागु औषध सहित ४ जनालाई  पक्राउ गरेको छ ।  बिपी राजमार्ग सिन्धुली – भीमान खण्डको  बाघमाराबाट चार जना पक्राउ परेका हुन् ।

एक्सिप्लोन-१५ र विनक्रेक्स कप सिरप-१४ अवैध औषधी सहित कमलामाई नगरपालिका – ८ बाघमाराबाट  साउन ५ गते शनिवार चार जना  पक्राउ परेको प्रहरी उपरीक्षक गोविन्दराज काफ्लेले बताए।

भीमान प्रहरीले चेकजाँच गर्ने क्रममा महोत्तरी औरही नगरपालिका -७ बस्ने अजय शाह, सिन्धुली कमलामाई नगरपालिका-७ माझिटार बस्ने दिलसन भनिने २० वर्षीय लोकविक्रम आले मगर,  चिसापानीको २३ वर्षको मिलन पाख्रिन र धुरा बजार बस्ने २७ वर्षीय  सौगात लामा १५ बोतल अवैध औषधी सहित उनी पक्राउ परेका थिए।

उनीहरूको  साथबाट स्पास्मो एक्सिप्लोन-१५ र विनक्रेक्स कप सिरप-१४ गरी १५ बोतल लागु औषध बरामद भएको थियो। सोधपुछ गर्दा आले मगर, पाख्रिन र लामाले लागु औषध सँगै पक्राउ परेका महोत्तरी औरही नगरपालिका -७ बस्ने २१ वर्षीय अजय शाहसँग खरिद गरेको बताएका थिए।

लागु औषध सहित उनीहरूले प्रयोग गरेको बा ९३ प ८८०८ र विआर ३० एम् १३११ नम्बरको दुई वटा  मोटरसाइकल समेत प्रहरीले नियन्त्रणमा लिएको छ।  जिल्ला अदालत सिन्धुलीमा ७ दिनको म्याद थप गरेर घटनाबारे अनुसन्धान भइरहेको प्रहरी उपरीक्षक गोविन्दराज काफ्लेले जानकारी दिए।